هلوووووووو....
شكد حلوه الحياة بدون (جيرلفريند) يعني بدون صاحبه , كبل, حاته , بكيفكم شتريدون تسمونهه سموهه بس مو (حبيبه) لان الحب وراه خطوبه وزواج واستقرار يعني حياة ممكن تكون حلوه!
الحياة راح تصير احلى بدون جيرلفريند ( عجبني هذا المصطلح... حلو الواحد تصير ثقافته انكلوزو... احسن من تسمياتنه) عموما ... للاسباب التاليه:
1- راح تكدر تباوع على أي بنيه برااااحتك.
2- ما تحتاج تصرف عليها.
3- ما راح تجيب درجات مصخمه باوراق امتحاناتك.
4- ماكو صديقه.... ماكو ابتزاز عواطف.
5- اذا مو صاحبتك.... ما راح تكدر تزعلك او تنكد عليك.
6- العلاقه العاطفيه تتسم بالحراره... فاذا ما عندك علاقه راح تعيش بحاله من البرود ... وما احتاج اوضحلك شكد البروده حلوه بهالصيف الحار خصوصا الكهرباء ماكو والتبريد تعذرني.
7- ما راح تعيش العذاب وانته تنتظر رنة التليفون.
8- ما راح تضطر تتحمل فد شخص ثاني يعرفلك شنو الصح وشنو الغلط.
9- البنات من طبعهن حب التملك فانته اذا صاحبت راح ماتكدر ابد تسوي شي مثل ما انته تريد.
10- تكدر تشتري هدايا لامك , لاختك , لاخوك , لابوك , لجدك وتعيش حياة اسريه اسعد بدل ما تشتريهن لصديقتك. أي مو احسن مما تنطبق عليك مقولة الشاعر العراقي الاصيل ( عايف امه وخواته ... ويشتغل لحبيباته)؟
11- ما تحتاج تضيع اوراقك بكتابة رسائل الحب او تخلص رصيدك مسجات حب.
12- ماكو انتظار مدمر لموعد مريب ممكن تشوفها بي ( لو تطل من باب بيتهم لو بدكان ابو حسن لو بسوق البنات .... الخ) وانته مسكين ما ضال ركن ما لازمه علمود تشوفها!
13- راح يصير عندك اصدقاء اكثر... لان راح يصير عندك وقت تطور بي علاقاتك الاجتماعيه.
14- ما راح تضطر تباوع قصص الحب الممله بدل لعبات الطوبه.
15- ما راح تحتاج تجذب هوايه بعد لذلك سيئاتك راح تقل.
16- راح تنام زين بالليل لان ما راح تحلم بيها.
17- ما راح تتعارك ويه اصدقائك علمود البنيه.
18- ماكو وجع راس وبواري.
19- ما راح تغرق ابحر عيونها ... يعني راح تسلم على عمرك وتعيش حياتك ويكولولك بالبدوي (طويل العمر).
20- ماكو شد اعصاب.
21- راح تكدر تكون ((( نفسك)))
22- ما راح تضطر تضم ارقام التليفونات اللي بنقالك وبعض الرسائل بملف مخفي او باسماء مستعاره.